(បទកាកគតិ)
ស្អែកអើយអើយស្អែក មួយពាន់ដងស្អែក ក៏ស្អែកដដែល
មួយថ្ងៃៗ ច្រើនក្រៃក្រាស់ក្រែល ស្អែកច្រើនដដែល
មិនមានព្រំដែន។
សញ្ជប់សញ្ជឹង រំពៃរំពឹង ថ្ងៃស្អែករាប់សែន
គេងចាំវេលា និន្ទាច្រណែន មិនគិតបោកបែន
ធ្វើស្រែចម្ការ។
គេថាថ្ងៃស្អែក ប្រៀបដូចជើងមេឃ ហួសផុតនេត្រា
ស្អែកប្រាំស្អែកដប់ ស្អែកគ្រប់វស្សា មិនចាំសត្វា
ដូចខ្សែទឹកហូរ។
ពេលនេះថ្ងៃនេះ គួរកុំប្រហែស តាំងចិត្តតស៊ូ
លះបង់កំហុស ដែលខុសពីយូរ ប្ដូរចិត្តគិតគូរ
សាងជីវិតថ្មី។
ធ្វើស្រែបានស្រូវ ញើសឈាមម៉ែឪ កូនកុំបំភ្លៃ
បំផ្លាញតាមចិត្ត ចូរគិតឃ្មាតខ្មី កុំឲ្យស្អែកថ្មី
ជេរស្ដីវាសនា។
ភ្នំពេញ ថ្ងៃទី១២ ខែមិថុនា ឆ្នាំ២០១២
No comments:
Post a Comment