Ros Veasna រស់ វាសនា: តេជោយ៉ត

សង្ខេបរឿងតេជោយ៉ត

និពន្ធដោយលោក ទី ជីហួត

នៅកំពង់ស្វាយ មានបុរសម្នាក់ឈ្មោះមាស មានងារជាឧកញ៉ាតេជោបរមរាជ ដែលគេហៅថា តេជោមាស។ លោកមានភរិយាឈ្មោះស្រែន មានងារជាជំទាវ និងមានសិស្សឈ្មោះ យ៉ត ដែលតែងតែទៅសមរភូមិជាមួយនឹងលោកគ្រប់ទីកន្លែង។ ស្វាមីភរិយាទាំងពីរនេះមានទឹកចិត្តស្រឡាញ់រាប់អាន យ៉ត ជាពន់ពេក។ ស្ដេចសម្រែ បានតាំងខ្លួនឯងថា «ស្ដេចសម្រែធិរាជ» បានតាំងទ័ពនៅកំពង់ហៅ (កំពង់ឆ្នាំង) ដោយបានរៀបចំបន្ទាយមួយឲ្យឈ្មោះថា «បន្ទាយនគរ»។ ស្ដេចសម្រែជាមេក្រុមបះបោរប្រឆាំងនឹងស្ដេចព្រះជ័យចេស្ដា ដើម្បីដណ្ដើមអំណាចគ្រប់គ្រងផែនដី។ តេជោមាសនិងយ៉តបានព្យាយាមលើកទ័ពទៅបង្ក្រាបក្រុមបះបោរនេះខ្លាំងណាស់ដែរ តែត្រូវបរាជ័យ។ ជំទាវស្រែនបានរៀបចំល្បិចបញ្ឆោតឲ្យស្ដេចសម្រែធ្លាក់ក្នុងអន្លង់ស្នេហ៍របស់នាង ហើយបង្អកស្រារហូតដល់ស្រវឹង។ ស្ដេចសម្រែនិងបក្សពួកត្រូវបានតេជោមាស យ៉ត និងកងទ័ពចាប់ទៅថ្វាយព្រះចៅជ័យចេស្ដាកាត់ទោសតាមច្បាប់នគរ។

ក្រោយពីបានជោគជ័យលើស្ដេចសម្រែរួចមក តេជោមាសក៏បានទទួលអនិច្ចកម្មទៅ។ ព្រះរាជាក៏ប្រទានងារនោះឲ្យទៅតេជោយ៉ត បំពេញនាទីដឹកនាំកងទ័ពជំនួស។ តេជោយ៉តបានទទួលរាជបញ្ជា និងដាវអាជ្ញាសឹកទៅបង្ក្រាបពួកឈ្លើយសឹកបះបោរនៅខេត្តពោធិ៍សាត់់។ ឆ្លងតាមបទពិសោធនរបស់ឧកញ៉ាចក្រី និងក្រឡាហោមទទួលការបរាជ័យក្នុងការបង្ក្រាបឈ្លើយសឹកនៅទីនោះ តេជោយ៉តបានរកឃើញថាការចាញ់សង្គ្រាមនេះ បណ្ដាលមកពីមានខ្មាំងនៅពីក្រោយខ្នង។ តេជោយ៉ត បានបញ្ជាឲ្យកេណ្ឌទ័ពនៅលង្វែក កំពង់ស្វាយ ក្នុងនោះមានម៉ឺនចៃចុងរ៉ាក់ ដែលប្អូនថ្លៃព្រះមហាក្សត្រផងដែរ។ ដើម្បីរកខ្មាំងខាងក្រោយខ្នង តេជោយ៉តបានបញ្ជាឲ្យកងទ័ពកំណែនទាំងអស់អូសឫស្សីបញ្ច្រាសចុងដើម្បីកសាងបន្ទាយ បើនរណាប្រឆាំងត្រូវសម្លាប់ចោល។ បក្សពួកម៉ឺនចៃចុងរ៉ាក់មិនបានធ្វើតាមបញ្ជានេះឡើយ ហើយថែមទាំងធ្វើតាមទំនើងចិត្តរបស់ខ្លួនព្រោះសំអាងលើបងស្រីដែលធ្លាប់ទទួលសំណូក និងជាអ្នកម្នាងនៃព្រះមហាក្សត្រ នឹងជួយឲ្យរួចផុតពីកំណែននេះ។ ទង្វើនេះត្រូវតេជោយ៉តរកឃើញថា ម៉ឺនចៃចុងរ៉ាក់នេះឯងជាខ្មាំងពីក្រោយខ្នង ហើយក៏ចាប់យកទៅសម្លាប់ចោលទៅ។ ក្រោយពីបានទទួលដំណឹងថាប្អូនប្រុសខ្លួនស្លាប់ អ្នកម្នាងនូ បានទូលព្រះរាជាឲ្យចាប់តេជោយ៉តទៅកាត់ទោសប្រហារជីវិត។ ព្រះរាជាបានធ្វើតាមការសុំរបស់អ្នកម្នាង តែតេជោយ៉តមិនបានមកតាមបញ្ជានោះឡើយ ដោយសំអាងថាខ្លួនជាប់ដៃបង្ក្រាបសត្រូវបះបោរចាំរួចការនោះ ខ្លួននឹងមកទទួលទោសដោយខ្លួនឯង។ ដោយការទទូចសុំរបស់អ្នកម្នាងខ្លាំងពេក ព្រះរាជាបានបង្ខំឲ្យតេជោយ៉តមកជួបតទល់ជាមួយអ្នកម្នាងនូ។ ពេលកំពុងជជែកគ្នានោះ តេជោយ៉តបានចោទប្រកាន់ថាអ្នកម្នាងនូជាខ្មាំងពីក្រោយខ្នង ព្រោះបានរំខានខ្លួនធ្វើសឹក បើកឱកាសឲ្យសត្រូវវាយលុកនិងទទួលសំណូក ដើម្បីការពារបក្សពួកម៉ឺនចៃចុងរ៉ាក់ ធ្វើឲ្យកងទ័ពបាក់ស្មារតី ហើយក៏គប់កូនដាវសម្លាប់អ្នកម្នាងនូនាពេលនោះទៅ។ តេជោយ៉តប្រកាសជម្រាបមន្ត្រីទាំងនោះថា ចាំបង្ក្រាបសត្រូវរួច នឹងចូលមកទទួលទោសពីព្រះអង្គដោយខ្លួនឯង។

ការបង្ក្រាបឈ្លើយសៀមបះបោរបានសម្រេចជោគជ័យ តេជោយ៉តឲ្យគេធ្វើឃ្នាង ហើយដាក់ខ្លួនឯងដើរចូលទៅទទួលទោសពីព្រះរាជាពីបទដែលខ្លួនសម្លាប់អ្នកម្នាងនូ។ ព្រះរាជាមិនឲ្យចូលជួប រួចបញ្ជាឲ្យមន្ត្រីដោះលែង និងឲ្យទៅត្រួតការងារឯខេត្តកំពង់ស្វាយ។ តេជោយ៉តបានកួចចិត្តប៉ងប្រាថ្នាយកជំទាវស្រែនមកធ្វើជាភរិយា តែមិនបានសម្រេចទេ ព្រោះជំទាវស្រែនបានគិតថា យ៉ត ជាជនជាតិភាគតិច ហើយជាសិស្សរបស់ប្ដីនាងពីមុនផងដែរ។ ដោយសង្កេតឃើញជំទាវស្រែនរើសអើងសេចក្ដីស្នេហាបែបប្រកាន់វណ្ណៈយ៉ាងនេះ តេជោយ៉តបានប្រើល្បិចលួចយកកាំជណ្ដើរផ្ទះជំទាវស្រែនមកឲ្យជាងដាប់ឆ្លាក់ជារូបព្រះពុទ្ធបដិមា និងរូបតេជោមាស ហើយប្រកាសធ្វើបុណ្យយ៉ាងធំបញ្ជូនកុសលទៅគ្រូររបស់ខ្លួន។ ជំទាវស្រែនបានទៅចូលរួមពិធីនេះ ហើយថ្វាយបង្គំព្រះពុទ្ធបដិមា និងរូបសំណាកតេជោមាសនោះ តែត្រូវបានតេជោយ៉តប្រាប់នូវការពិតថាថ្វាយបង្គំកាំជណ្ដើររបស់ខ្លួនឯង។ គ្រានោះជំទាវស្រែនយល់ន័យនៃទង្វើរបស់តេជោយ៉ត ហើយក៏ព្រមព្រៀងរៀបការជាមួួយតេជោយ៉តនាពេលនោះទៅ។

ចប់

ទាញយកអត្ថបទសង្ខេប

សូមមើលវីដេអូបន្ថែមទៀត