ព្រលឹងមាសបង ក្នុងគ្រានេះម្ដង ប៉ងស្ម័គ្រតែស្រី
ក្នុងចិត្តរញ្ជួយ គេងព្រួយឥតបី តើអូនប្រណី
ឬមួយយ៉ាងណា។
ព្រលឹងមាសបង ចង់ជួបផ្ដោះផ្ដង សាសងវាចា
ពាក្យពោលពីរោះ ស្ម័គ្រស្មោះស្នេហា សម្ដីសត្យា
ឲ្យរៀមស្បើយចិត្ត។
ព្រលឹងមាសបង ស្រស់ស្រីនួនល្អង បងចង់កៀកកិត
រៀមដូចត្រកួន ស្ងួនដួចព្រលិត ប្រលែងរួមរឹត
ក្នុងបឹងស្នេហា។
ព្រលឹងមាសបង រាត្រីកន្លង ឆ្លងផុតវស្សា
ខែប្រាំងសើចក្អិក កក្ដិកចរចា សំឡេងភ្លេងការ
កែវកុំនៅថ្មឹង។
ព្រលឹងមាសបង រៀមសូមត្រកង បមបីព្រលឹង
ប្រលែងប្រលូក ល្អើនល្អូកកុំខឹង ស្រស់ស្រីច្រឡឹង
ញញឹមសមសួន។
ព្រលឹងមាសបង ខ្យល់បក់ម្ដង រាត្រីស្ងាត់សូន្យ
រូបបងរងារ រឭកតែអូន ប្រៀបដូចជាក្បួន
ខះអស់គង្គា។
ព្រលឹងមាសបង សូមផ្ញើចិត្តផង ស្រស់ស្រីសោភា
បងអ្នកផ្សងព្រេង ខំស្វែងរកគ្នា សុំចិត្តពុំងារ
កុំដាច់មេត្តា។
ព្រលឹងមាសបង រៀមរស់សៅហ្មង ទ្រូងរងសោកា
ព្រោះតែស្រីមួយ ចិត្តព្រួយយ៉ាងណា ពេញណែនឱរា
រៀមរឹតរងកម្ម។
ព្រលឹងមាសបង មើលចុះក្ដាមខ្យង មានគូប្រចាំ
ប្លែកអីរូបបង សៅហ្មងយូរឆ្នាំ បេះដូងផ្ដែផ្ដាំ
ចិត្តស្នេហ៍តាមខ្យល់។
ព្រលឹងមាសបង នឹកអូនម្ដងៗ ចិត្តព្រួយកង្វល់
រាងកាយស្គមស្គាំង ភាន់ភាំងវិលវល់ រស់រែងអំពល់
ខ្វល់ខ្វាយនឹកស្រី។
ព្រលឹងមាសបង ឱ!កែវទងវង ឆោមឆើតពិសី
បងដូចគង្គា ពុំងារដូចត្រី រៀមដូចរាជសីហ៍
អាស្រ័យគុហា។
ព្រលឹងមាសបង អូនជាបង្គង បងសារិកា
រៀមជាកន្លង់ ចិត្តលង់បុប្ផា អូនជាតារា
បងជាផែនដី។
ព្រលឹងមាសបង ជួយចាំបំណង ប៉ងស្ម័គ្រពិសី
បើដឹងខ្លួនហើយ កែវអើយប្រណី ដល់ចិត្តរីងរៃ
រាល់ថ្ងៃកំព្រា។
ព្រលឹងមាសបង រៀមអុជធូបផ្សង ស្រស់ស្រីសោភា
សម្ដីគួរសម រមទមឬកពារ គួរយកជាគ្នា
ជាគូវាសនា។
ព្រលឹងមាសបង ទឹកហូរហូរឆ្លង ជ្រលងបព្វតា
បងប្រៀបដូចព្រៃ រស់ដោយទឹកថ្លា ហូរតាមថ្មដា
ស្រោចស្រពស្នេហ៍ខ្ញុំ។
ព្រលឹងមាសបង ផ្កាក្នុងរបង មានម្ចាស់គ្រងឃុំ
បងជាបក្សី គ្មានព្រៃជ្រកទំ ប្រៀបដូចជាឃ្មុំ
រស់ខ្វះបុប្ផា។
ព្រលឹងមាសបង សាច់សហ្មត់ហ្មង គួចចិត្តស្នេហា
បំណាច់បានជួប ជំនួបចរចា សូមផ្ញើចិន្ដា
កែវអើយកុំខឹង។
ព្រលឹងមាសបង វេលាកន្លង លូតលាយសន្ធឹង
ជីវិតបងមួយ ព្រួយព្រោះព្រលឹង ក្នុងមួយជាតិហ្នឹង
ពេញដួងហឫទ័យ។
ព្រលឹងមាសបង មាសមេស្នេហ៍ស្នង ល្អលើសអស់ស្រី
ក្លែបក្លិនក្រអូប ក្រាលក្របកេសី ភក្ត្រមានរស្មី
គួចអន្ទងចិត្ត។
ព្រលឹងមាសបង ឱ!កែវនួនល្អង អូនល្អពេកពិត
ចង់ចិត្តក្បែរមេ បំពេរមាសមិត្ត កំដរស្នេហ៍ស្និទ្ធ
ជាប់ទោសស្នេហា។
ព្រលឹងមាសបង អ្នកទោសដូចបង សមមានទោសា
ហ៊ានស្រលាញ់ស្ងួន នឹមនួនស្នេហា មិនមើលវណ្ណា
វណ្ណៈក្រក្រៃ។
ព្រលឹងមាសបង សើចសមកន្លង ដូចកែវចរណៃ
នេត្រាខ្មៅយង់ ចិត្តលង់ស្រមៃ រូបរស់អាល័យ
អាលោះស្នេហ៍ស្និទ្ធ។
ព្រលឹងមាសបង រីកស្រស់បំព្រង ស្រស់ស្រាយមាសមិត្ត
រៀមគ្មានបំណង ប៉ុនប៉ងបាបចិត្ត លើស្រស់ស្នេហ៍ស្និទ្ធ
កែវកន្និដ្ឋា។
ព្រលឹងមាសបង កែវកុំបែរខ្នង សាសងវាចា
ឲ្យទ្រូងបានល្ហើយ ចិត្តស្បើយទុក្ខា សង្គ្រោះសង្ខារ
បងឲ្យមានន័យ។
ព្រលឹងមាសបង ក្រែងមានឆ្គាំឆ្គង កែវអើយអភ័យ
ពេលថ្ងៃល្ងាចព្រឹក បងនឹកតែស្រី រៀងរាល់រាត្រី
ស្រមៃមានភ័ព្ទ។
ព្រលឹងមាសបង ផែនថ្ពាល់ទាំងសង ទុំដូចទន្លាប់
កែវភ្នែកស្រទន់ ល្អពន់គួរគាប់ កែវភ្នែកថតជាប់
សម្រស់ស្នេហ៍ស្រី។
ព្រលឹងមាសបង ខ្យល់បក់ម្ដងៗ រងាញ័រភ័យ
បើបានប្រលោម ក្បែរឆោមពិសី ម្ល៉េះសមរាល់ថ្ងៃ
ត្រេកក្នុងចិន្ដា។
ដោយ រស់ វាសនា
ដោយ រស់ វាសនា
No comments:
Post a Comment