បន្ទាប់ពីភារតៈត្រលប់មកអយុធ្យា ព្រះរាមៈ សិតា និងលក្ស្មណៈ ក៏បានចាកចេញពីភ្នំចិត្រកូត និងធ្វើដំណើរព្រៃទន្ទកៈ (Dandaka) វិញ។ កន្លែងនេះហើយដែលពួកគេរស់នៅបានជិត១០ឆ្នាំ បន្ទាប់មក ពួកគេបានទៅព្រៃបញ្ចវតិ (Panchavati)។
បញ្ចវតិជាព្រៃដ៏ស្រស់ស្អាត និងស្ងប់ស្ងាត់ នៅតាមច្រាំងទន្លេគោទវារី (Godavari)។ ព្រះលក្ស្មណៈបានសាងសង់ខ្ទមពីរ មួយសម្រាប់ព្រះរាមៈ និងព្រះនាងសិតា និងមួយទៀតសម្រាប់ខ្លួនឯង។ ពួកគេរស់នៅយ៉ាងរីករាយ។
ថ្ងៃមួយ មាននាងយក្ខិនីមួយក្បាល ឈ្មោះថា សុរបនខា បានមកដល់ទីនេះ។ នាងបានសម្លឹងមើលព្រះរាមៈ និងលួចបេតី។ នាងបានដើរតម្រង់ទៅរកព្រះអង្គ និងសួរថា «ខ្ញុំម្ចាស់ចង់រៀបការជាមួយព្រះអង្គ។»
«តើនាងជានរណា?» ព្រះរាមៈសួរទាំងឆ្ងល់។
«ខ្ញុំគឺជាសុរបនខា ជាប្អូនស្រីតែមួយគត់របស់ រាវណៈ ស្ដេចនៃក្រុងលង្កា ចំណែកឯ កុម្ពកាណ៌ វិភិសាណៈ ខរៈ និងទុសាណៈ គឺសុទ្ធតែជាបងប្អូនរបស់ទូលបង្គំ។»
«ខ្ញុំមិនអាចរៀបការជាមួយនាងបានទេ។ នេះគឺជាភរិយារបស់ខ្ញុំ សិតា កំពុងតែឈរជិតខ្ញុំ។ ប្អូនប្រុសរបស់ខ្ញុំនៅទំនេរ នាងអាចទៅរកគេបាន។» ព្រះរាមៈតប។
នាងសុរបនខា ក៏បានដើរសំដៅទៅរកលក្ស្មណៈ និងនិយាយថា «ពិតជាសង្ហាមែន ខ្ញុំចង់រៀបការជាមួយព្រះអង្គ តើស្រលាញ់ខ្ញុំទេ?»
ព្រះលក្ស្មណៈនិយាយបែបលេងសើចថា «ម៉េចក៏ចង់រៀបការជាមួយខ្ញុំ? នោះនាងនឹងក្លាយជាអគ្គមហេសី បើរៀបការជាមួយព្រះរាមៈ។»
នៅពេលអ្វីៗមិនបានជោគជ័យ នាងសុរបនខា ក៏បានហក់ទៅសង្គ្រប់លើព្រះនាងសិតា ហេតុនេះព្រះរាមៈក៏ចាប់នាងនោះចេញ។ និយាយពីព្រះលក្ស្មណៈវិញក៏ស្ទុះទៅទាំងកំហឹងពេលដែលឃើញព្រះនាងសិតាត្រូវនាងសុរបនខាធ្វើបាប។ គេក៏ទាញដាវចេញ និងកាត់ច្រមុះនិងត្រចៀករបស់នាង។ សម្រែកឈឺចាប់ក៏បន្លឺឡើង នាងសុរបនខាក៏ទៅជួបបងប្រុសរបស់នាងគឺខរៈ។
នាងបានរៀបរាប់អំពីព្រះរាមៈ និងលក្ស្មណៈ។ គ្រានោះ ខរៈក៏បានចេញទ័ពភ្លាម ដោយម្នាក់ៗរួសរាន់កាន់ដាវនិងលំពែងចេញទៅ ប៉ុន្តែក៏ត្រូវព្រះរាមៈ និងលក្ស្មណៈសម្លាប់គ្មានសល់ រួមទាំងខរៈ និងទុសាណៈផង។
សុរបនខា ក៏រត់ទៅជួបបងប្រុសនៅក្រុងលង្កា គឺរាវណៈ ស្ដេចនៃក្រុងលង្កា។ ដោយយល់ហេតុការណ៍ និងស្ដាប់ការរៀបរាប់របស់នាង រាវណៈក៏ក្រោធយ៉ាងខ្លាំង។ គេពិតជាចង់បាននាងសិតាណាស់ ប៉ុន្តែគេធ្លាប់បរាជ័យកាលប្រលងលើកធ្នូ។ នេះគឺជាឱកាសមាសហើយដើម្បីសងសឹក។ ដូច្នេះ គេក៏រកឧបាយកលដើម្បីបញ្ឆោតចាប់នាងសិតា។
គេបានហៅ មារិឆៈ ជាពួករាក្សដែរ និងបានប្រាប់ថា «ប្អូនប្រុសរបស់យើងត្រូវគេសម្លាប់ដោយមនុស្សពីរនាក់នៅព្រៃបញ្ចវតិ គឺរាមៈ និង លក្ស្មណៈ ហើយប្អូនស្រីរបស់យើងក៏ត្រូវដាច់ច្រមុះនិងត្រចៀកដោយសារពួកវាទាំងពីរដែរ។ យើងមិនឲ្យវារួចខ្លួនឡើយ។ ចូរស្ដាប់តាមផែនការរបស់យើង។»
«យើងនឹងទៅចាប់នាងសិតា ប្រពន្ធរបស់រាមៈ។ ដើម្បីសម្រេចរឿងនេះបាន យើងត្រូវការឲ្យឯងជួយ។ ពេលទៅដល់កន្លែងនោះ ឯងត្រូវកាឡាខ្លួនជាប្រើសមាសភ្លាម ហើយបញ្ឆោតពួកវាឲ្យចេញពីនាងសិតាតែម្ដង។»
«តែពួកវាប្រាកដជាសម្លាប់ខ្ញុំ!» មារិឆៈ ស្រែក។
«បើអ៊ីចឹងមែន មុននឹងឯងស្លាប់ ឯងត្រូវក្លែងសំឡេងឲ្យដូចរាមៈ ហើយស្រែកទៅ ដើម្បីឲ្យប្អូនប្រុសរបស់វាចេញមកជួយ។»
សំណួរ
១.តើព្រះរាមៈ ព្រះនាងសិតា និងលក្ស្មណៈ បន្តដំណើរទៅទីណាទៀត បន្ទាប់ពីភារតៈវិលទៅក្រុងអយុធ្យាវិញ? តើពួកគេរស់នៅទីនោះរយៈពេលប៉ុន្មាន?
២.ក្រោយមក ពួកគេបន្តដំណើរទៅណាទៀត? ចូរពណ៌នាអំពីទីកន្លែងនោះ។
៣.ចូររៀបរាប់អំពីជំនួបរវាងនាងសុរបនខា ព្រះរាម និងព្រះលក្ស្មណៈ។
៤.តើនរណាខ្លះជាបងប្រុសរបស់សុរបនខា? តើបងប្រុសណាខ្លះនាងបានមកសុំជំនួយមុនគេ?
៥.តើរាវណៈបានធ្វើដូចម្ដេច ពេលដែលដឹងថាខរៈត្រូវគេសម្លាប់?
No comments:
Post a Comment