|
ន័យអត្ថានុរូប
(ន័យចំ)
|
«កាប់បំពង់» គឺជាសកម្មភាពដែលយកឧបករណ៍ដូចជា កាំបិត
ពូថៅ ទៅកាប់ដើមឫស្សី ចំណែកឯ «រង់ចាំ» មានន័យថា ទន្ទឹងផ្លូវនរណាមួយ
ដោយបុគ្គលនោះឬអ្វីមួយដែលមិនទាន់បង្ហាញវត្តមាននៅឡើយ ហើយ «ទឹកភ្លៀង»
គឺជាបាតុភូតធម្មជាតិ
ដែលកើតឡើងដោយសារកំណកទឹកនៅក្នុងលំហប៉ះនឹងធាតុត្រជាក់ក៏ក្លាយទៅជាទឹកភ្លៀងមក។
តាមរយៈន័យចំ គឺសំដៅទៅលើការយកបំពង់ ចាំត្រងទឹកភ្លៀង ក្រែងលោមានភ្លៀង។
|
|
|
|
|
ន័យអត្ថបដិរូប
(ន័យធៀប)
|
«កាប់បំពង់» សំដៅលើសកម្មភាពមួយដែលមិនច្បាស់លាស់
មិនដឹងគោលដៅ ហើយធ្វើទៅតាមព្រេងវាសនា គ្មានជំនឿលើខ្លួនឯង ចំណែកឯ
«រង់ចាំទឹកភ្លៀង» គឺនៅស្ងៀមមិនធ្វើទៀតទេ ចាំឲ្យលាភចូលមកដល់ខ្លួន។
ដូចសុភាសិតទាំងមូលមានន័យថា
បុគ្គលទាំងឡាយណាដែលធ្វើសកម្មភាពដោយគ្មានគោលដៅ ផែនការ គ្មានចក្ខុវិស័យ
នោះមិនអាចទទួលបានផលដែលគ្រោងទុកនោះឡើយ ទាល់តែមានការប្រឹងប្រែង
រកដោយវិធីសាស្ត្រណាដែលវ័យឆ្លាត
មិនមែនចាំតែគេផ្ដល់ឲ្យគ្រប់ពេលនោះឡើយ។
|
សេចក្ដីអធិប្បាយ
ជាការពិតណាស់
ការសង្ឃឹមទៅលើអ្នកដទៃច្រើនពេក ឬចាំតែគេពេក
ប្រាកដជាមិនទទួលបានផលល្អឡើយ ហើយជីវិតនឹងជួបតែរឿងស៊យ
និយាយរួមគឺបរាជ័យតែម្ដង ដោយហេតុថា
មិនគួរទុកចិត្តនរណាក្រៅពីខ្លួនយើងឡើយ។ ដោយមើលឃើញទង្វើបែបនេះ
ទើបបុរាណលោកហៅពពួកមនុស្សទាំងនោះថា «កាប់បំពង់ រង់ចាំទឹកភ្លៀង»។
តើសុភាសិតនេះចង់និយាយអំពីអ្វី?
ដើម្បីជាស្ពានចម្លងទៅដល់ការបកស្រាយឲ្យកាន់តែក្បោះក្បាយនោះ
ជាបឋម គួរគប្បីស្វែងយល់នូវពាក្យគន្លឹះមួយចំនួនជាមុនសិន ដូចជា «បំពង់»
«រង់ចាំ» និង«ទឹកភ្លៀង»ជាដើម។ ពាក្យថា «បំពង់»
គឺច្រើនតែធ្វើឡើងពីឫស្សី ហើយអាចស្ដុកទឹកបានល្មមនឹងផឹកបាន ចំណែកឯ
«រង់ចាំ»
សម្គាល់ទៅលើសកម្មភាពទន្ទឹងចាំអ្វីមួយដោយមិនដឹងថាគេមកឬមិនមក រីឯ
«ទឹកភ្លៀង» បានន័យថា ជាអង្គធាតុរាវដែលធ្លាក់ពីលើលំហមក។ តាម រយៈសុភាសិតខាងលើ
គេអាចពន្យល់តាមន័យត្រង់បានថា កាលណាយកបំពង់ទៅត្រងទឹកភ្លៀង ប្រាកដជាពិបាកមិនខាន
ព្រោះពេលខ្លះមិនប្រាកដថាភ្លៀងឡើយ
នោះនាំឲ្យបាត់បង់កម្លាំងកាយកម្លាំងចិត្ត និងខាតពេលវេលាជាក់ជាមិនខាន
ចំណែកឯន័យធៀបវិញចង់បង្ហាញថា
ក្នុងនាមជាមនុស្សមិនគួរផ្ដេកផ្ដួលទៅតាមព្រហ្មលិខិតនោះឡើយ គួរចេះពិចារណាឲ្យបានល្អិតល្អន់មុននឹងធ្វើអ្វីមួយ
ទើបអាចទទួលបានផលសម្រេច។
ជាការពិតណាស់
មានមនុស្សខ្លះពោរពេញទៅដោយភាពល្ងង់ខ្លៅ ខ្វះសេចក្ដីព្យាយាម ដោយគិតថា
នឹងមិនបាច់ទៅណាទេ រង់ចាំតែគេផ្ដល់ឲ្យទៅប្រាកដជារស់ជាក់ជាមិនខាន
ចំណែកអ្នកខ្លះទៀតត្រូវចាញ់បោកគេ
ដោយគិតថាអ្វីដែលគេនិយាយនោះគឺជាការពិត ក៏ជឿស្លុងតែម្ដង ទីបំផុត
ក៏ត្រូវខាតបង់អស់រលីង។ ជាក់ស្ដែង ដូចករណី បោកប្រាស់តាមទូរសព្ទជាដើម
មិនដែលធ្វើស្អីផង សុខៗស្រាប់តែមានភ្នាក់ងារទូរសព្ទមិនស្គាល់អត្តសញ្ញាណម្នាក់តេមកប្រាប់ថា
ត្រូវរង្វាន់ធំមួយម៉ឺនដុល្លារ ដោយភាពល្ងង់ខ្លៅ ជននោះក៏ជឿតាម
ហើយចុងក្រោយក៏ត្រូវខាតបង់។ ហេតុនេះ វាមិនមែនជារឿងសំណាងឡើយ
តែជាបញ្ហាទៅវិញ។ មួយវិញ គេអាចនិយាយម្យ៉ាងទៀតថា
មនុស្សដែលមិនសូវខិតខំនឹងការងារ ចូលចិត្តធ្វេសប្រហែស
ហើយរង់ចាំឲ្យតែគេជួយគ្រប់ពេល
វេលានោះ ពិតណាស់ គ្មាននរណាចាំជួយយើងគ្រប់កាលៈទេសនោះទេ។
ផ្ទុយទៅវិញ បុគ្គលគ្រប់រូបគួររំលាយអវិជ្ជាចោល ហើយចាប់យកចំណេះវិជ្ជាវិញ
ទើបប្រសើរ ហើយពឹងលើសមត្ថភាពខ្លួនឯងឲ្យបានច្រើនវិញ។
តួយ៉ាងនៅក្នុងរឿងព្រះអាទិត្យថ្មីរះលើផែនដីចាស់ សម
មានសេចក្ដីព្យាយាមយ៉ាងខ្លាំង
ទម្រាំអាចរកលុយសម្រាប់បំពេញសេចក្ដីស្រេកឃ្លានប្រចាំថ្ងៃបាន
រកល្ងាចខ្វះព្រឹក រកព្រឹកខ្វះល្ងាច នេះខំផង នៅតែមិនសល់
ចុះទម្រាំតែខ្ជិលទៀតមិនដឹងជាស្លាប់ប៉ុន្មានដងនោះឡើយ។ បន្ថែមពីនេះ
តាមរយៈរឿងទុំទាវ ព្រះបាទរាមាជើងព្រៃបានរើសស្នំប៉ះចំនាងទាវ
តែដោយសេចក្ដីក្លាហាន និងការពុះពាររបស់ទុំ ហ៊ានប្រថុយនឹងគ្រោះថ្នាក់
ទើបព្រះអង្គព្រមរៀបមង្គលការឲ្យអ្នកទាំងពីរតាមផ្លូវច្បាប់។
មួយវិញទៀត នៅក្នុងរឿងរាមកេរ្តិ៍
នៅពេលដែលក្រុងរាពណ៍ចាប់នាងសីតាយកទៅក្រុងលង្កាបាត់ទៅ
ព្រះរាមនៅមិនសុខឡើយ ទ្រង់ខិតខំកែណ្ឌទ័ពយ៉ាងច្រើន
ដើម្បីទៅដណ្ដើមយកមហេសីមកវិញ
សេចក្ដីតស៊ូនេះក៏ធ្វើឲ្យព្រះអង្គអាចសម្រេចបំណងប្រាថ្នាបាន។ ក្រៅពីនេះ
នៅក្នុងរឿង កុលាបប៉ៃលិន របស់លោក ញ៉ុក ថែម ក៏បានបញ្ជាក់ឲ្យឃើញថា ចៅចិត្រ
ថ្វីត្បិតតែក្រីក្រ
តែរូបគេមិនបណ្ដែតបណ្ដោយខ្លួនទៅតាមស្ថានភាពរបស់ខ្លួនឡើយ
ប៉ុន្តែគេមានសេចក្ដីភ្ញាក់រឭកជានិច្ច ទីបំផុត ក៏ទទួលបានផ្លែផ្កាគួរជាទីគាប់ចិត្ត។
សរុបមក បុគ្គលទាំងឡាយណា ដែលមិនក្រោកឈរ មិនតស៊ូ
មិនខំពិចារណាស្វែងរកមធ្យោបាយសម្រាប់ជីវិតនោះទេ
ជននោះនឹងជួបតែរឿងអាក្រក់ ងាយនឹងរងគ្រោះ
ឬអាចមានបញ្ហាដល់ខ្លួនឯងនិងគ្រួសារទៀតផង។ ផ្ទុយទៅវិញ បើជននោះចេះដឹងអ្វីៗដែលនៅជុំវិញខ្លួន
នោះគេនឹងអាចស្វែងរកនូវសុភមង្គលក្នុងជីវិតបាន។
|
ថ្ងៃពុធ ទី១០កើត ខែស្រាពណ៌ ឆ្នាំច សំរឹទ្ធិស័ក
ព.ស.២៥៦២
សៀមរាប ថ្ងៃទី១៩ ខែកញ្ញា ឆ្នាំ២០១៨
ហត្ថលេខា
រស់ វាសនា
|
No comments:
Post a Comment