សែនក្រអូប
សែនក្រអូបស្រូបស្រេចមិនណាយ
គន្ធាសុះសាយផ្សាយសព្វទី
កន្លង់វង្វេងវិលវល់វក់វី
បុប្ផាសោភីនៅទីណា។
ពេលរៀមស្រូបស្រង់ចង់ឃើញស្ងួន
ម្ដេចលាក់បំពួនភាន់នេត្រា
តើធ្វើម្ដេចទៅជួបបុប្ផា
ឬគ្មានវាសនាក្នុងជាតិនេះ។
មានតែផ្ដាំខ្យល់ជួយនាំផ្លូវ
កួចពាក្យប្រាប់ពៅថ្លៃវិសេស
កន្លង់ហិចហោះហើរចចេស
ទ្រូងតឹងស្ទើរប្រេះបែកជាបី។
សែនក្រអូបរៀមស្រូបមិនដាច់
រង្គាត់ប្ដូរផ្ដាច់ក្លិនពិសី
កន្លង់បាក់ស្លាបក្រាបដល់ដី
អង្វរប្រណីយល់ស្នេហ៍បង។
No comments:
Post a Comment